Umuvugizi wa AFC/M23, Lawrence Kanyuka yemeje ko ibisasu biri kugwa mu bice igenzura biri guturuka mu Burundi

Ihuriro AFC/M23 rirwanya ubutegetsi bwa Repubulika Iharanira Demokarasi ya Congo ryatangaje ko ibisasu biri kugwa mu bice rigenzura mu Ntara ya Kivu y’Amajyepfo biri guturuka mu Burundi.

Kuva mu gitondo cyo kuri uyu wa 5 Ukuboza 2025, Ingabo za RDC, iz’u Burundi na Wazalendo ziri kugaba ibitero mu bice byo muri Teritwari ya Uvira birimo Katogota, Kamanyola no muri Gurupoma ya Luvungi.

Ibisasu byaguye muri Santere ya Luvungi byatumye abaturage benshi bahunga berekeza mu bindi bice byo muri Uvira bitari kuberamo imirwano nka Sange, Runingu, Ndolera no mu Mujyi wa Uvira.

Umuyobozi Wungirije wa AFC/M23 ushinzwe ibikorwa bya politiki, Bertrand Bisimwa, yatangaje ko ingabo z’Abarundi ziri mu Burundi ziri kurasa muri Kamanyola, Katogota na Luvungi.

Ati “Muri iki gitondo, ingabo z’u Burundi ziri mu Burundi ziri gusuka ibisasu mu bice bituwe cyane muri Kamanyola, Katogota na Luvungi, zigateza imfu z’inzirakarengane zirimo abana, zigasenya inzu, amashuri, insengero n’amasoko.”

Bisimwa yashyize ku mbuga nkoranyambaga amashusho agaragaza uburyo ibisasu byasenye inzu z’abaturage, yumvikanamo umuturage uvuga ko mu mudugudu uri hafi y’umusozi wa Ngomo muri Kamanyola.

Uyu muturage avuga ati “Igisasu cya mbere cyaguye hano. Inzu zose zasenyutse. Abantu batandatu bapfuye hafi ya Ngomo. Ibintu birakomeye.”

Umuvugizi wa AFC/M23, Lawrence Kanyuka, yatangaje ko Ingabo z’Abarundi ziri mu Burundi zatangiye kurasa mu bice bituwe n’abasivili benshi kuva mu minsi irenga itatu ishize, yongeraho ko abarwanyi babo biteguye gukomeza kurwanira abari mu kaga.