Al Nassr itari yagatsinzwe umukino n’umwe muri shampiyona ya Arabia Saudite itangiye umwaka nabi

Ku wa Gatanu tariki ya 02 Mutarama ni bwo Al Nassr itari yagatsinzwe umukino n’umwe muri shampiyona ya Arabia Saudite yatsinzwe ibitego 3-2 n’ikipe ya Al Ahli. Cristiano Ronaldo ntiyabonye igitego muri uyu mukino, ndetse ntiyigeze abona amahirwe afatika yo gutsinda.  

Al Nassr iri ku mwanya wa mbere ku rutonde rwa shampiyona yatsinzwe na na Al Ahli iri ku mwanya wa kane, ibyahise bituma ijya ku gitutu dore ko kuri ubu irusha amanota abiri gusa Al Hilal ya kabiri ndetse yo ikaba igifite n’umukino wayo izakina ejo. Iramutse iwutsinze, yahita yicara ku mwanya wa mbere. 

Uyu mwaka wa 2026 ni wo Cristiano Ronaldo ashobora gukoreramo amateka agatsinda ibitero 1000 ariko biramusaba gukora cyane dore ko kuri ubu afite ibitego 958.

Bisobanuye ko mu gihe hasigaye amezi atarenga atandatu ngo hatangire Igikombe cy’Isi cya 2026, hakiri ibitego 42 ngo agere ku ntego ikomeye cyane mu mateka y’umupira w’amaguru.

Nubwo uyu mukinnyi ubitse Ballon d’Or 5 bitamugendekeye neza kuri uyu mukino ariko aracyari umukinnyi uyoboye abandi mu gutsinda ibitego muri Shampiyona ya Arabia Saudite aho anganya na João Félix ibitego 13.

Muri rusange, Cristiano Ronaldo amaze gutsinda ibitego 14 mu mikino 16 ya Al Nassr muri uyu mwaka w’imikino wa 2025–2026, hakiyongeraho ibindi bitanu yatsindiye ikipe y’igihugu ya Portugal mu mikino itanu amaze kuyikinira.