Museveni yatangiye kwanikira Bobi Wine

Ibyavuye mu ibarurwa ry’amajwi by’agateganyo mu gitondo cyo kuri uyu wa Gatanu, bigaragaza ko Museveni ari imbere n’amajwi 76%, mu gihe Robert Kyagulanyi uzwi nka Bobi Wine afite amajwi 20%. Amajwi yose amaze kubarurwa angana na 45%.

Nathan Nandala Mafabi w’ishyaka Forum for Democratic Change (FDC) ari ku mwanya wa gatatu n’amajwi 2,08%, Mugisha Muntu wa ANT akagira 0,57%, mu gihe Elton Joseph Mabirizi wa Conservative Party (CP) afite 0,21%.

Robert Kasibante wa NPP afite 0,28%, Mubarak Sserunga Munyagwa wa CMP akagira 0,28%. Frank Bulira Kabinga wa RPP we afite 0,45.

Biteganyijwe ko ibyavuye mu matora mu buryo bwa burundu bizatangazwa tariki 17 Mutarama 2026.

Mu gihe ibintu byakomeza gutya, Museveni w’imyaka 81 yakwegukana manda ya karindwi nk’Umukuru w’Igihugu muri Uganda.

Robert Kyagulanyi akomeje kwanikirwa na Museveni, mu gihe ku wa 14 Mutarama 2025, nyuma yo gutora yari yatangaje ko yiteguye kwegukana intsinzi ku majwi 80%, natibwa.

Ku ruhande rwa Museveni nawe yari yatangaje ko yiteguye gutsinda, akabona nibura amajwi 80% mu gihe “nta bikorwa byo kwiba amajwi bibayeho” ndetse anavuga ko bidashoboka ko Bobi Wine yamuhigika.

Museveni yagiye ku butegetsi muri Uganda mu 1986, nyuma yo gutsinda urugamba rwahiritse ubutegetsi bwa Milton Obote.

Yiyamamaza, yavuze ko natorwa azakomeza kwimakaza imiyoborere n’iterambere bishingiye ku mutekano, guteza imbere inganda, kubaka ibikorwaremezo ndetse akarinda ibyagezweho.

Kyagulanyi, wavutse mu 1982, ni umwe mu batavuga rumwe n’ubutegetsi bakomeye ndetse bakurikiranwa cyane n’urubyiruko rwa Uganda.

Yamenyekanye cyane mu muziki nka ‘Ghetto President’ cyangwa se Bobi Wine, mbere yo kwinjira mu Nteko Ishinga Amategeko mu 2017.

Muri aya matora ahagarariye ishyaka rya National Unity Platform (NUP).

Nk’Umuyobozi wa NUP, Bobi Wine yakomeje kugaragaza ko ashaka guha ijambo urubyiruko cyane ko rugize umubare munini w’abaturage.

Yongeye kwiyamamaza nyuma y’uko mu matora yo mu 2021 yahigitswe na Perezida Yoweri Kaguta Museveni.